Gwneud Byth Bythoedd Amen yn Hygyrch

Mae Theatr Cymru yn falch iawn o weithio gydag artistiaid ac ymgynghorwyr o Craidd ar ei chynhyrchiad diweddaraf, Byth Bythoedd Amen. 

Wedi’i hysgrifennu gan yr actor a’r awdur, Mared Jarman – menyw anabl falch – mae Byth Bythoedd Amen yn archwilio cariad, colled a bywyd fel person ifanc anabl mewn byd sy’n blaenoriaethu’r brif ffrwd. Gyda lleisiau a straeon unigolion anabl wrth galon y cynhyrchiad, mae hygyrchedd y perfformiadau wedi bod yn flaenoriaeth i Mared, y tîm cynhyrchu a’r cwmni – ac mae cefnogaeth Craidd wedi bod yn hollbwysig i’r broses. 

Mae Craidd yn gydweithrediad rhwng pump o sefydliadau yng Nghymru, sef Theatr Clwyd, Theatr y Sherman, Pontio Bangor, Theatr y Torch, a Choleg Brenhinol Cerdd a Drama Cymru. Ei chenhadaeth yw gwella cynrychiolaeth brif ffrwd, ar gyfer a gyda phobl Fyddar, anabl a niwroamrywiol ledled Cymru. Wrth ddatblygu Byth Bythoedd Amen, bu’r tîm cynhyrchu yn gweithio ochr yn ochr a Chyfarwyddwr Newid Craidd, Sara Beer a’r Asiantau dros Newid Bridie Doyle-Roberts a Jonny Cotsen. 

Dywedodd Sara o Craidd: 

“Fel rhan o fenter Craidd rydym yn falch o allu cynnig cefnogaeth i gwmnïau sy’n ymweld â’n canolfannau partner, ac mae wedi bod yn bleser pur i weithio gyda thîm Theatr Cymru ar Byth Bythoedd Amen, darn o waith hardd a phwysig sy’n bendant am gael ei fwynhau gan gynulleidfaoedd ledled Cymru. Rydym yn hynod o werthfawrogol o ymrwymiad cyfredol Theatr Cymru i greu gwaith theatr hygyrch ac rydym yn edrych ymlaen at gyd-weithio yn y dyfodol”. 

Dywed Rhian A. Davies, Cyfarwyddwr Cynhyrchu Theatr Cymru:   
"Ry' ni'n ddiolchgar iawn bod Craidd wedi cydweithio â ni ar sioe newydd Mared Jarman, Byth Bythoedd Amen: sioe sy'n agor yn Theatr y Sherman sef un o ganolfannau partner Craidd, a sioe sydd â chynhwysedd yn ganolog yn ei stori. Diolch tîm Craidd am eich mewnwelediad creadigol: i Sara am fod yn rhan o'r cynllunio o'r dechrau a chynghori ni wrth lunio cais llwyddiannus ar gyfer Mynediad i Waith; i Jonny am gefnogi ni wrth greu a chyfathrebu am y capsiynau dwyieithog; ac i Bridie am roi adborth i ni ar y sain ddisgrifio Cymraeg. Bydd yr elfennau mynediad yma ar gael ym mhob perfformiad ar y daith."

Bydd capsiynau agored Cymraeg a Saesneg ar gael ym mhob perfformiad o Byth Bythoedd Amen. Bydd hefyd sain ddisgrifio yn y Gymraeg gan Eilir Gwyn, a fydd hefyd yn arwain y teithiau cyffwrdd cyn pob perfformiad, gan gynnig cyfle i ymweld â’r set, y propiau a’r gwisgoedd. Bydd crynodeb Saesneg o’r ddrama hefyd ar gael i’r rhai sy’n dymuno dysgu mwy am y ddrama ymlaen llaw.