Mae taith genedlaethol Swyn ar ei hanterth ar hyn o bryd – ond mae awdur a pherfformiwr y sioe, Krystal S. Lowe, a’n Cydlynydd Cyfranogi, Sian Elin James, eisoes wedi teithio i ysgolion ledled Cymru gyda neges bwerus y cynhyrchiad o ddathlu gwahaniaeth a meithrin hunan-gariad.
Fis Hydref, treuliodd Krystal a Sian Elin bythefnos yn ymweld ag ysgolion cynradd gyda gweithdai drama a dawns yn seiliedig ar fyd arbennig Swyn. Roedd cyfle i ddisgyblion ddarganfod mwy am fyd natur, cyfeillgarwch, a defnyddio’u dychymyg i greu cymeriadau newydd.
Yn ystod eu siwrnai, teithiodd Krystal a Sian Elin bron at 500 milltir – gan ymweld â 9 ysgol a gweithio gyda mwy na 300 o blant. Ac yn ôl pob sôn, roedd tipyn o hwyl a sbri ar hyd y ffordd!
Dywedodd Krystal:
“Roedd hi’n brofiad anhygoel i ymweld â mwy na 300 o blant Cymraeg eu hiaith cyn taith Swyn ledled Cymru. Roedd pob un o’r plant bywiog a bendigedig yma wedi mwynhau drama a dawns gyda Sian Elin a minnau. Gyda’n gilydd, gwnaethom archwilio antur anifeiliaid Swyn a mynegiant emosiynol. Dwi’n edrych ‘mlaen at weld nhw gyd eto wrth i ni deithio Cymru y gaeaf hwn!”
Dywedodd Sian Elin:
“Am fraint i gael gweithio gyda Krystal a phlant bach ar draws Cymru gyda’r gweithdai arbennig yma! Diolch i’r 9 ysgol am y croeso cynnes ac i’r disgyblion am yr holl hwyl a sbri yn y sesiynau – roedd hi’n wych cael cyfle i gwrdd â chi gyd. Diolch arbennig i Krystal am fod yn bartner gweithdy arbennig ac am greu byd Swyn i ni gyd!”
Diolch i chi’ch dwy am swyno plant ledled y wlad gyda’ch gwaith! Os ydych chi eisiau ymuno yn yr hwyl a dod i wylio'n sioe arbennig, cliciwch isod i fachu tocynnau.
Mae’n fraint i ni gael ein henwebu gan UK Theatre ar gyfer gwobr Rhagoriaeth Mewn Teithio.
Yr hydref hwn, mae Theatr Genedlaethol Cymru yn cynnal pecyn o waith sy’n codi ymwybyddiaeth am yr argyfwng dyngarol presennol yn Gaza ac yn creu cysylltiadau creadigol newydd rhwng pobl ifanc yng Nghymru a Phalesteina.