ie ie ie yn Eisteddfod yr Urdd

Pwy sy’n ffansi dro i Meifod gyda ni? Ie. Ie? Ie!

Ar ôl teithio ysgolion a theatrau ddechrau’r flwyddyn, mae Ie Ie Ie yn dod i Eisteddfod yr Urdd eleni fel rhan o Ŵyl Triban.

Gyda’r actores a chomedïwr anhygoel Eleri Morgan wrth y llyw, mae Ie Ie Ie yn archwilio perthnasau iach, chwant a chaniatâd mewn ffordd feddylgar a chwareus – ac yn galon i’r cynhyrchiad, mae ffilmiau byrion wedi’u creu ar y cyd â phobl ifanc ledled Cymru yn trafod rhamant a’r byd sydd ohoni.

Dyma’r tro cyntaf erioed i Theatr Gen fynd â sioe i Eisteddfod yr Urdd ac ry’n ni’n falch o wneud hynny gyda’r darn pwysig hwn am brofiadau bywyd go iawn pobl ifanc, sy’n ceisio newid y naratif o gwmpas cyd-synio.

"Archwiliad doniol, heriol a phwysig o gydsyniad ... nid yw’n or-ddrwm, or-ffraeth nag or-ddifrifol – mae’n berffaith!" Arts Scene Wales

"Gogoneddus oedd clywed pobl ifanc yn siarad yn groyw... yn ddewr a gyda gonestrwydd." BBC Radio Cymru

Wedi'i gyfarwyddo gan Juliette Manon a’i addasu i’r Gymraeg gan Lily Beau, mae Ie Ie Ie yn seiliedig ar Yes Yes Yes; sioe fyw arobryn gan y gwneuthurwyr theatr o Aotearoa/Seland Newydd, Karin McCracken ac Eleanor Bishop.

Bydd Ie Ie Ie ymlaen yn Yr Arddorfa ar y Maes am 1.30pm ar 31 Mai 2024. Am ddim gyda thocyn i’r Maes – dewch draw!

Mae Ie Ie Ie wedi’i greu ar gyfer pobl ifanc 14 oed a hŷn – ac mae’n cynnwys iaith gref, themau aeddfed a thrafodaethau am rhyw, pornograffi, ymosodiadau rhywiol a thrais.

Wrth ddatblygu’r cynhyrchiad a gweithio gyda chyfranogwyr ifanc ar draws y wlad, mae’r cwmni wedi derbyn hyfforddiant a chefnogaeth ymgynghorol gan y mudiad Brook Cymru, elusen iechyd rhywiol i bobl ifanc. Os ydych chi wedi’ch effeithio gan themâu’r cynhyrchiad, mae cymorth bellach ar gael trwy wefan Brook: brook.org.uk.