Dawns y Ceirw (Taith Japan)

Mae hi'n noson oer y gaeaf ac mae Carw yn chwarae ar ei ben ei hun yn yr eira, yn hiraethu am ychydig o gynhesrwydd a charedigrwydd. 

Yn sydyn, mae golau bach disglair yn ymddangos! Er nad yw wedi mentro’n bell o’i bentref o’r blaen, mae Carw’n penderfynu dilyn y golau bach disglair ar antur hudolus trwy’r goedwig lle mae’n darganfod y cryfder a’r cariad sydd yn ei galon ei hun. 

Ar ôl swyno cynulleidfaoedd ledled Cymru, mae'r stori hudolus hon yn dychwelyd am adfywiad arbennig iawn – ac mae’n teithio ymhellach nag erioed o'r blaen! Mae Dawns y Ceirw yn mynd i Japan, gan ddod â chelfyddydau a diwylliant yr iaith Gymraeg i gynulleidfa ryngwladol newydd. 

Wedi’i ysgrifennu a’i berfformio gan Casi Wyn (Bardd Plant Cymru 2022-23), ochr yn ochr â'r dawnswyr Osian Meilir a Ruby Portus, mae'r cynhyrchiad hudolus hwn yn cyfuno cerddoriaeth, symud a dychymyg mewn stori gynnes am gyfeillgarwch a gobaith. 

Cynhyrchiad Theatr Cymru, gyda chefnogaeth Cwmni Dawns Cenedlaethol Cymru a Tŷ Cerdd.