Cartref newydd i Theatr Gen

Mae Theatr Gen wedi symud i gartref newydd yng Nghanolfan S4C yr Egin, Caerfyrddin! 

Yn dafliad carreg i ffwrdd o’n cyn-gartref yn Y Llwyfan, ry’n ni’n falch iawn o ddechrau pennod newydd i'r cwmni ac ymuno â’r gymuned o gwmnïau creadigol yn yr adeilad arbennig hwn. 

Mae’r newid mawr hwn yn mynd law yn llaw ag ymdrech i gyflawni ein gwaith mewn ffyrdd mwy cynaliadwy a lleihau ôl-troed carbon y cwmni.  Ein nod yw bod yn sefydliad sero net erbyn 2030, yn unol â tharged Sector Gyhoeddus Llywodraeth Cymru. Mae ymgartrefu yn yr Egin yn gam mawr tuag at gyrraedd y nod hwn oherwydd cymwysterau gwyrdd yr adeilad, sydd wedi cyrraedd safon Ardderchog BREEAM. Mae’r swyddfa newydd agored hefyd yn cynnig gofod cydweithio gwerthfawr i ni, sy’n gweddu i batrymau gwaith hybrid ein tîm yn sgil y pandemig. 

Wrth gwrs, wrth bacio’n swyddfeydd yn y Llwyfan ar ôl 15 mlynedd, daethom o hyd i dipyn o drysorau, yn cynnwys sgriptiau o gynyrchiadau’r gorffennol sydd wedi cael eu rhannu gydag ysgolion a llyfrgelloedd ledled Cymru, a hefyd hen bropiau a gwisgoedd fydd yn cael eu hail-bwrpasu ar gyfer ein cynyrchiadau nesaf. 

Diolch o galon i bawb yn yr Egin am y croeso cynnes. Ry’n ni’n edrych ymlaen i’r dyfodol wrth setlo yn ein cartref newydd a methu aros i groesawu artistiaid, cwmniau a chydweithwyr  – os ‘chi yn yr Egin, dewch draw i ddweud helo.  

Eisiau darllen mwy am ein hymrwymiad i gynaliadwyedd a’r amgylchedd? Ewch i'n tudalen Cynaliadwyedd.