Cynaliadwyedd a'r Amgylchedd

Ry’n ni’n byw mewn argyfwng hinsawdd.   

Fel cwmni diwylliannol cenedlaethol, mae gennym ni gyfrifoldeb i gyflawni’n gwaith mewn ffyrdd mwy cynaliadwy, i leihau ein ol-troed carbon, ac i gychwyn a hwyluso sgyrsiau a syniadau sy’n ymdrin â’r argyfwng hinsawdd a’r effaith mae’n ei gael ar fywyd yng Nghymru a thu hwnt heddiw.   

Sut ry’n ni’n gweithredu  

Ein nod yw bod yn sefydliad sero net erbyn 2030, yn unol â tharged Sector Gyhoeddus Llywodraeth Cymru. Dyma sut mae pethau’n mynd: 

• Ry’n ni’n dilyn canllawiau Llyfr Gwyrdd y Theatr (theatregreenbook.com) i sicrhau bod ein cynyrchiadau yn gynaliadwy. Mae hyn yn cynnwys gwneud cynaliadwyedd yn un o’r prif flaenoriaethau wrth ddechrau unrhyw gynhyrchiad newydd, cyrchu deunyddiau mewn ffordd gynaliadwy, ac ailgylchu a darganfod ffyrdd newydd o ddefnyddio darnau o set, props a gwisgoedd. Ry’n ni’n falch o rannu bod ein cynyrchiadau teithiol Tylwyth (2022) a Pijin | Pigeon (2023) wedi cyrraedd gwaelodlin safonau’r Llyfr Gwyrdd.   
• Ry’n ni wedi symud cartref ein cwmni i'r Egin yng Nghaerfyrddin, adeilad sydd wedi derbyn tystysgrif BREEAM Excellent dros gynaliadwyedd.   
• Ry’n cynnig patrwm gwaith hyblyg er mwyn sicrhau bod effaith carbon ein tîm craidd mor isel â phosib. Pan mae angen teithio, ry’n ni’n rhannu trafnidiaeth, neu’n defnyddio trafnidiaeth gyhoeddus lle’n bosib, ac yn cynllunio ein teithiau yn effeithlon 
• Ry’n ni bellach yn gweithredu fel swyddfa di-bapur, wrth gyflawni gwaith gweinyddol a chyllidol trwy lwyfannau cwmwl a lleihau gwastraff  
• Ry’n ni wedi lleihau ein marchnata print yn sylweddol ac wedi cyflwyno mwy o adnoddau digidol am ddim i'n cynulleidfaoedd  
• Ry’n ni’n gweithio gydag ymgynghorydd amgylcheddol sy’n ein cynghori ar hyd ein siwrne tuag at gyflawni sero net a’n cadw ar y trywydd cywir  
• Byddwn yn defnyddio’r ‘Creative Green Tools’ wedi’u datblygu gan Julie’s Bicycle (juliesbicycle.com/) ar gyfer diwydiannau celfyddydol a diwylliannol i lywio ein strategaeth amgylcheddol a’n blaenoriaethau sefydliadol. 

Ein prosiectau creadigol nesaf  

Mae ein hymrwymiad at fynd i‘r afael â’r argyfwng hinsawdd yn mynd ymhell tu hwnt ein prosesau creadigol a gweinyddol. Ry’n ni hefyd yn sparduno sgyrsiau creadigol ac yn hwyluso cyfleoedd i artistiaid archwilio effaith yr argyfwng hinsawdd ar fywyd yng Nghymru trwy’r gyfrwng y Gymraeg.

Byddwn yn eich diweddaru wrth i ni geisio cyrraedd ein nod o sero net. Os hoffech fwy o wybodaeth am ein hymrwymiad tuag at gynaliadwyedd neu i rannu eich syniadau ar sut y gallwn ni wella’n ymdrechion, cysylltwch â ni.