Eisteddfod 2018: Pentref Drama
7 – 11 Awst 2018
Eisteddfod Genedlaethol Caerdydd 2018
Y Pentref Drama ar faes yr Eisteddfod Genedlaethol yw prif ganolbwynt y gweithgareddau drama yn ystod y brifwyl. Mae Theatr Genedlaethol Cymru yn falch o noddi’r Pentref Drama ac yn gweithio mewn partneriaeth â’r Eisteddfod, ac mewn cyd-weithrediad â sefydliadau eraill, i lunio rhaglen ar ei gyfer mewn lleoliadau megis Theatr y Maes a Chaffi’r Theatrau.
Gyda’r Eisteddfod eleni wedi’i lleoli ym Mae Caerdydd, ac yn gwneud defnydd o adeiladau parhaol ynghyd â strwythurau dros dro deniadol, mae’r Pentref Drama wedi ei wasgaru ar draws y Bae a thu hwnt.
Bydd Theatr y Maes wedi ei leoli yn Ystafell Ymarfer 3, Canolfan Mileniwm Cymru (drws nesaf i’r Babell Lên, sydd wedi ei lleoli eleni yn Stiwdio Weston); a Chaffi’r Theatrau yng Nghaffi Sïo, ger Crefft yn y Bae. Bydd digwyddiadau theatr hefyd yn y Babell Lên, Portland House, Y Senedd a Chapter, yn ogystal â rhai mannau eraill. Bydd angen i ymwelwyr brynu band garddwrn er mwyn cael mynediad i Theatr y Maes a’r Babell Lên yn ystod y dydd cyn 5yp, er mwyn galluogi’r trefnwyr i reoli niferoedd sydd yng Nghanolfan y Mileniwm ar unrhyw adeg. Bydd y band garddwrn hefyd yn rhoi mynediad i’r Pafiliwn yn ystod y dydd. Ceir fanylion llawn am fand garddwrn Eisteddfod Caerdydd 2018 yma.
Cydlynir Caffi’r Theatrau gan Theatr Genedlaethol Cymru mewn partneriaeth â’r Eisteddfod Genedlaethol a Chapter ac mewn cydweithrediad â nifer o bartneriaid eraill. Mae’r partneriaid hynny eleni yn cynnwys Fran Wên, Theatr Bara Caws, Galeri, Pontio, Theatr Clwyd, Arad Goch, Theatr y Sherman, Canolfan y Celfyddydau Aberystwyth ac Opera Cenedlaethol Cymru.
Yma cewch ymlacio gyda phaned mewn awyrgylch anffurfiol, a chyfle i glywed mwy am gynlluniau cyffrous y gwahanol ganolfannau a chwmnïau theatr ac opera. Bydd digon o weithgareddau amrywiol rhad ac am ddim yno drwy gydol yr wythnos, gyda digon yno hefyd i ddiddanu’r plant (yn cynnwys cyfle i wisgo i fyny!).
Rydym yn falch hefyd o gefnogi Y Babell Lên, gyda bod nifer o ddigwyddiadau theatr yno eleni.
Gweler raglen lawn y Pentref Drama yma.