Mae Melchior wedi cael digon o’r celwydd, Moritz yn cael ei boenydio gan freuddwydion brwnt, a Wendla bron â marw eisiau deall y gwir am fabis.

Mewn byd lle mae ar yr oedolion ofn wynebu’r gwir, mae Melchior yn herio’r system gyda chanlyniadau brawychus a bythgofiadwy.

Dyma addasiad Cymraeg Dafydd James o’r sioe gerdd roc wefreiddiol ‘Spring Awakening’. Ers iddi agor am y tro cyntaf ar Broadway yn 2006, derbyniwyd canmoliaeth fyd-eang iddi ac enillodd llu o wobrau, gan gynnwys Gwobrau Tony ac Olivier.

Mae’r sioe, sy’n seiliedig ar ddrama ddadleuol Frank Wedekind, yn ymdrin â gormes rhywiol ac yn cael ei hadrodd mewn ffordd onest a miniog fydd yn siŵr o ysgogi trafodaeth.

‘Wel, sdim dwywaith am hyn . . . dwi’n f****d . . .’

Aeth Deffro’r Gwanwyn ar ddwy daith yng Nghymru, yn 2010 ac yn 2011.