Mae Blodeuwedd yn anniddig, a Llew yn anfodlon. Er iddo drechu tynged ei fam, a chael gwraig wedi’i chreu o flodau, mae’n dal i ysu am etifedd. Ac mae natur wyllt Blodeuwedd yn gwneud iddi deimlo fel carcharor yn ei chartref ei hun. Pan syrthia Gronw Pebr mewn cariad â hi, daw cyfle o’r diwedd i ddianc . . . ond rhaid yn gyntaf ladd Llew.

Yn dilyn llwyddiant cynhyrchiad Theatr Genedlaethol Cymru o Blodeuwedd yn Nhomen y Mur, ger Trawsfynydd, yn 2013, cafwyd cyfle arall i weld dehongliad oesol Saunders Lewis o’r hen, hen chwedl ar daith i theatrau yn 2014.  Ac yntau’n cwblhau’r ddrama hon yn fuan wedi’r Ail Ryfel Byd, mae’r awdur yn ein hatgoffa mai arf peryglus yw natur yn nwylo dyn.