Rydym yn falch o gyhoeddi mai Enfys gan Melangell Dolma yw’r ddrama gyntaf mewn cyfres o Ddramâu Micro gennym ni, BBC Cymru Fyw a BBC Radio Cymru.

Yn y bartneriaeth gyntaf hon o’i math, rydym ni’n cydweithio gyda BBC Cymru Fyw a BBC Radio Cymru i ddatblygu profiadau theatrig i’n cynulleidfaoedd fwynhau ar blatfformau digidol yn ystod y cyfnod hwn. Mae’r dramâu byrion wedi’u hysgrifennu gan rai o’n aelodau Grŵp Dramodwyr Newydd ac wedi’u creu o dan amgylchiadau ymbellhau cymdeithasol

Melangell Dolma yw’r dramodydd. Yn wreiddiol o Lanfrothen yn Sir Feirionydd, mae Melangell wedi bod yn Awdur Preswyl yn Theatr Clwyd ac yn aelod o Grŵp Dramodwyr Newydd Theatr Genedlaethol Cymru. Cafodd ei drama gyntaf, Bachu, ei llwyfannu yn Eisteddfod Genedlaethol Sir Conwy 2019. Mae Melangell hefyd yn actores ac wedi ymddangos mewn nifer o gynyrchiadau theatr a chyfresi teledu.

Dyma’r ail brosiect i Rhian Blythe gyfarwyddo ers bod o dan ein mentoriaeth drwy gynllun Awenau. Mae gwaith teledu diweddar Rhian fel actores yn cynnwys Morfydd, Deian a Loli ac Un Bore Mercher i S4C. Mae ei gwaith llwyfan yn cynnwys ein cynhyrchiad o Blodeuwedd, Dros y Top i Theatr Bara Caws, a Deep Cut i Theatr y Sherman.

Mae Richard Nichols yn actor o Borthcawl. Mae wedi ymddangos mewn nifer fawr o berfformiadau theatr gan gynnwys Penblwydd Poenus Pete (Theatr Iolo) ac An Enemy of the People (Theatr Clwyd) a hefyd yn wyneb gyfarwydd ar y teledu ar ôl ymddangos yn Dr Who (BBC), Byw Celwydd a Pobol y Cwm (S4C) i enwi ond rhai.

Mae’r prosiect hwn yn rhan o Creu Ar-lein, sef cynllun newydd gan Theatr Genedlaethol Cymru i ymateb i argyfwng y coronafeirws a’r her o greu gwaith dramatig gwreiddiol mewn cyfnod o ymbellhau cymdeithasol. Ceir rhagor o fanylion am Enfys yma.

Melangell Dolma, Richard Nichols, Rhian Blythe

9 Mehefin 2020