Nyts, Nag’yn Ni?

Mae Eleri yn gwneud pob dim o fewn ei gallu i ddal ei gafael ar yr unig beth sefydlog yn ei bywyd, ond dyw hynny ddim yn hawdd pan fo hwnnw, Gavin, yn gyndyn iawn o ymrwymo i unrhyw
beth . . .

Beth wnaeth apelio atat i ymgeisio ar gyfer project Grŵp Dramodwyr Newydd?

Y cyfle i gael fy ngwaith wedi’i lwyfannu oedd wir yn apelio wrth ymgeisio i’r cynllun Grŵp Dramodwyr Newydd, gan wybod bod modd i fi gael cymorth ac adborth wrth wneud, a chael dysgu mwy gan ddramodwyr am sut mae drama yn cael ei chynhyrchu, o waith caib a rhaw y ‘sgrifennu i’w pharatoi gyda chyfarwyddwr ac actorion i’w chyflwyno o flaen llwyfan.

Beth wyt ti wedi’i fwynhau fwyaf am fod yn rhan o’r grŵp?

Yr hyn dwi wedi mwynhau fwyaf yw cael esgus i ‘sgrifennu. Dwi’n gweithio llawn amser, felly roedd y gweithdai misol yn sanctaidd, yn gyfle i switsho bant o gyfrifoldebau’r byd go iawn a bwrw ati i ‘sgrifennu gyda chriw sy’n teimlo’r un peth. Heb os roedd cael cwmnïaeth y criw hefyd yn help mawr wrth weithio ar y ddrama – mae ‘na lot o drafod bywiog wedi bod ar hyd y daith!

Wyt ti’n gwneud llawer o waith ymchwil wrth fynd ati i ysgrifennu?

Dwi’n dueddol o ‘sgrifennu’n eitha greddfol, a cheisio ymddiried yn y ‘gut feeling’ yna, felly dwi’n troi at y ‘sgrifennu ac yna’n gwneud gwaith ymchwil i wirio pethau wrth ail-ddrafftio.

Pryd ddechreuaist ti sgwennu?

Mae ‘sgrifennu’n rhywbeth dwi wedi bod yn ei wneud erioed, felly mae meddwl am ddechreubwynt yn amhosib. Fodd bynnag, cefais gefnogaeth Huw Meirion Edwards a Mihangel Morgan pan ddilynais gwrs ysgrifennu creadigol ac anogaeth Branwen Davies pan ddilynais gwrs sgriptio ym Mhrifysgol Aberystwyth.

Bydd dy waith yn cael ei ddarllen yn gyhoeddus yn ystod Theatr Gen Creu ar Daith: Pwy ’Sgrifennodd Honna? – wyt ti’n edrych ymlaen at gael dy waith wedi’i ddarllen yn gyhoeddus ar lwyfan?

Dwi wir, wir yn edrych ymlaen – er bod meddwl am sut fydd pobl yn ymateb yn eithaf brawychus. 

Wyau

Meithrin bywyd newydd yw bara menyn pob ffarmwr. Ond nid yw llenwi’u nyth mor rhwydd i Mari a’i gŵr Gwyn.

Beth wnaeth apelio atat i ymgeisio ar gyfer project Grŵp Dramodwyr Newydd?

Ffrind anfonodd y linc ata i, ac es i amdani – do’dd gen i ddim i’w golli. Wedd cael lle’n sioc! Ond roedd y cyfle’n un euraid, yr arweiniad a’r gweithdai, y cyfle i weld dramâu. Mae’r project wedi codi fy hyder, wedi fy ysbrydoli a’m sbarduno i sgwennu.

Beth wyt ti wedi’i fwynhau fwyaf am fod yn rhan o’r grŵp?

Y cyfle i drafod,  arbrofi ac i sgwennu. Mae ’na deimlad cartrefol, r’yn ni i gyd yn yr un cwch!

Wyt ti’n gwneud llawer o waith ymchwil wrth fynd ati i ysgrifennu?

Wel, dwi wedi ymchwilio dipyn wrth sgwennu ‘Wyau.’ Oherwydd natur y pwnc roedd hi’n allweddol fy mod i’n ymchwilio er mwyn gwneud cyfiawnhad â hanes Mari a Gwyn. Fues i’n lwcus iawn o gael cymorth a gonestrwydd fy ffrind a’m cydweithwraig Sharlaine ar hyd y daith (diolch enfawr iddi). Gwyliais ambell raglen ddogfen ar Netflix yn ogystal â darllen sawl erthygl. Roedd Cennydd, fy sboner hefyd yn lot o help o ran cyfeiriadau at y calendr amaethyddol.

Pryd ddechreuaist ti sgwennu?

Dwi’n cofio sgwennu stori am lynger y ci ar gyfer Eisteddfod Maenclochog yn mlwyddyn 2. Wedi hynny yn Ysgol y Preseli cyn mynd ymlaen i astudio Cymraeg ac Astudiaethau Theatr ym Mhrifysgol Aberystwyth.

Bydd dy waith yn cael ei ddarllen yn gyhoeddus yn ystod Theatr Gen Creu ar Daith: Pwy ’Sgrifennodd Honna? – wyt ti’n edrych ymlaen at gael dy waith wedi’i ddarllen yn gyhoeddus ar lwyfan?

Bydd clywed fy ngeiriau ar lwyfan am y tro cynta’n brofiad arbennig ond tan hynny – pili palas!