“Agor ein llygaid i fyd y theatr”

Blog gan Heledd James a Lowri Richardson (Ysgol Gyfun Bro Myrddin).

Rydym wedi cael wythnos llawn hwyl a phrofiadau newydd yn ystod yr wythnos gyda Theatr Genedlaethol Cymru.

Roeddwn yn lwcus bod gan y Theatr drama ‘Nansi’ yn cymryd lle trwy gydol yr wythnos. Cawsom y cyfle i fod yn rhan o’r criw wrth weithio blaen tŷ yn gwerthu rhaglenni a stiwardio yn ystod y ddrama. Dysgom lawer o bethau newydd yn ystod y dyddiau eraill, un o’r diwrnodau gaethom y cyfle i sortio un o’r storfeydd. Yn ystod y broses yma fe wnaethom ddysgu sut i ddefnyddio golau yn ystod drama, hefyd wnaethom dysgu am y mathau o oleuadau gwahanol sydd i gael a’r gels unigryw.

Er mwyn paratoi ar gyfer y ddrama, aethom o amgylch Y Tymbl yn hysbysebu\\\\\\\’r ddrama trwy roi pamffledi trwy ddrysau rhai tai. Hefyd cawsom y cyfle i gwrdd â’r cast, y criw ac ymweld ar set. Yn ogystal â hyn, wnaethom ddosbarthu pamffledi o amgylch siopau yng Nghaerfyrddin. Tasg arall roedd yn rhaid i ni wneud oedd creu ‘Mood Board’ i ymwneud gyda’r Theatr Genedlaethol Cymru’. Bwriad y bwrdd yma oedd i’n helpu ni i greu ffilm fer ar gyfer y Theatr Genedlaethol Cymru.

Ar ddechrau’r wythnos cafon ni ein tywys o amgylch yr adeilad yn gweld yr ystafelloedd gwahanol a dysgu am swyddi gwahanol bobl. Roedd hwn yn rhoi blas i ni am ba fath o waith roedd y swyddi yma yn cynnwys.

Mae’r profiad yma wedi agor ein llygaid i fyd theatr ac i’r pethau sydd yn digwydd tu ôl i’r ymarferion hir. Rydym yn gobeithio gwnaeth staff Theatr Genedlaethol Cymru mwynhau ein cwmni yma gan rydym ni wedi joio mas draw!

Diolch am y profiad anhygoel.

“Mor gyffrous oedd gweithio dan bwysau”

Deuddydd hwyliog iawn cefais yng Nghriccieth yr wythnos diwethaf â’r cwmni yn ymarferion Nansi ac roedd hi’n braf iawn cael bod yn ôl mewn gweithle â llawer o wynebau cyfarwydd ers i mi fod yn rhan o gast cymunedol Chwalfa.

Yr eiliad camais fewn i’r man chwarae yn y Neuadd Goffa, roeddwn yn gwybod fod y cynhyrchiad yn mynd i fod yn ergyd galed yn erbyn cynyrchiadau Cymreig eraill cynhaliwyd yn ystod y tymor theatrig hwn. Roedd y set ar fin cael ei adeiladu yng nghanol y gynulleidfa, a’r swydd gyntaf oedd symud yr holl fyrddau, cadeiriau a phropiau eraill i mewn i’r neuadd ar gyfer yr ymarfer cyntaf yma. Mor gyffrous yr oedd gweithio dan bwysau amser cyfyngedig i fudo’r holl set fewn i’r neuadd a chael edmygu dyluniad set gwefreiddiol Carl Davies oedd yn rhoi dehongliad gonest a didwyll iawn o wreiddiau Nansi ym Mhen-y-bont, yn ogystal â’i bywyd chwyrlïol gynhyrfus fel telynores fyd-enwog.

Ar ôl gosod popeth yn ei le, cefais i a’r cast ein tywys o gwmpas y neuadd er mwyn dod i adnabod y perfformdy ble byddai’r daith hwn yn cychwyn a sylweddolir mor briodol ac addas oedd y neuadd goffa i gynnal y cynhyrchiad hwn, oherwydd ei gyfnod a’i gyflwr. Roedd archwilio mewn i ymarferion cynhesu fyny’r actorion yn ddiddorol hefyd, wrth i mi weld sut roedd y gweithgareddau’n plethu fewn i weithredoedd corfforol y cymeriadau dehonglir ganddynt yn nerthol.

Wrth i’r ymarferion gychwyn, roedd hi’n braf cael gweld yr holl elfennau amrywiol oedd i gymeriad eang Nansi a’r holl waith paratoi seicolegol oedd yn angenrheidiol er mwyn dod a’r holl gymeriadau’n fyw. O ganlyniad i hyn, sylweddolais fwyfwy ar y daith cymerwyd gan Nansi i ddod yn delynores fyd-enwog yn ogystal â dod yn fwy ymwybodol ar ddylanwadau ei chartref a’i theulu ar ei phersona cerddorol. Gwelwn mor ddwys a throm oedd yr ymarferion yn feddyliol yn ogystal â chorfforol, er mwyn cael cyflead hanfodion elfennig y cymeriadau yn gwbl glir i gynulleidfa.

Er mor fuan daeth y deuddydd i derfyn, cefais amser gwych yn gwylio Nansi’n dod at ei gilydd yn yr ymarferion ac mor ddifyr oedd cael arsylwi ar ddatblygiad cynhyrchiad proffesiynol o’r math hwn yn cael ei saernïo gan gydweithio cadarn ac ymrwymol ar draws nifer o feysydd amryfal. Anogaf unrhyw un o unrhyw oed i fynd i weld y cynhyrchiad gwreiddiol hwn ar daith, yn ogystal â phrofiad gwaith i bobl ifanc â’r cwmni oherwydd ei fod yn rhoi sbectrwm helaeth o’r diwydiant theatrig i lygaid ychydig llai dibrofiad mewn theatr.

“Synais o fawredd y cynhyrchiad…”

Blog gan Mirain Alaw Jones.

Dros y blynyddoedd dwi wedi gweld nifer o gynyrchiadau’r Theatr Genedlaethol, o sioeau cerdd i ddramâu absẃrd, o ddramâu gwreiddiol Cymraeg i rai sy’n gyfieithiadau o ieithoedd eraill. Mae’r cynyrchiadau dwi wedi’u gweld wedi bod yn amrywiol ac mae eistedd mewn theatr a chael fy ngwefreiddio gan yr hyn a welaf o’m blaen wedi cyfrannu at fy niddordeb mewn drama a’r theatr. O ganlyniad, rwyf erbyn hyn yn astudio’r ddrama fel rhan o’m cwrs ôl-raddedig ym Mhrifysgol Caerdydd ac yn mwynhau dysgu am yr ochr sgriptio. Rwyf wedi cael profiad felly o weld cynhyrchiad gorffenedig ar lwyfan, ac astudio sut i ysgrifennu sgript, ond roedd rhywbeth ar goll yr oeddwn am ddysgu mwy amdano, sef sut mae dod â chynhyrchiad yn fyw ar lwyfan? Wrth dreulio wythnos gyda’r Theatr Genedlaethol ym Mangor yn eu gwylio’n llwyfannu cynhyrchiad Chwalfa yn adeilad newydd Pontio, dysgais lawer am y gwaith diwyd sy’n mynd ymlaen y tu ôl i’r llenni i greu cynhyrchiad gorffenedig sy’n aros yn y cof.

Mi es i ar gyfnod o brofiad gwaith ar wythnos y pymthegfed o Chwefror, sef yr wythnos roedd y perfformiadau o Chwalfa’n dechrau. Ro’n i’n ymwybodol cyn dechrau felly y byddai’r wythnos hon yn un prysur i’r cwmni, ac ro’n i’n awyddus i weld beth oedd yn digwydd yn y dyddiau olaf yn arwain at berfformiad cyntaf cynhyrchiad. Cefais arsylwi sawl maes o fewn y cwmni yn ystod fy wythnos, o edrych ar waith cyfarwyddo Arwel Gruffydd, gweld y rhediadau technegol a gwisgoedd, dysgu am yr App Sibrwd a sut y caiff ei weithredu, a gweld sut y mae’r tîm yn cyd-weithio effeithiol i greu cynhyrchiad gorffenedig. Heb os, roedd hi’n wythnos ddifyr a dysgais lawer mwy am y Theatr Genedlaethol a’i gwaith nag yr oeddwn wedi disgwyl.

Cefais gyfle i holi aelodau’r cwmni am y cynhyrchiad ac am yr hyn roeddent wedi bod yn gwneud yn ystod yr wythnosau cynt wrth baratoi at y perfformiadau. Synais o fawredd y cynhyrchiad. Doeddwn heb weld cynhyrchiad â chymaint o gast o’r blaen ac felly roedd hwn yn brofiad hollol unigryw cael gweld sut roedd y cynhyrchiad yn llwyddo i gynnwys cymaint o gast ar y llwyfan. Roedd dysgu am App Sibrwd yn brofiad gwerthfawr gan ei fod yn gysyniad newydd i’r theatr Gymraeg ac yn ddull effeithiol o alluogi cynulleidfaoedd di-gymraeg i fwynhau dramâu Cymraeg. Cefais weld sut y caiff ei weithredu a sut roedd y criw wedi mynd ati i gynhyrchu’r ddarpariaeth hon ar gyfer cynulleidfaoedd di-gymraeg.

Roedd cael wythnos o brofiad gwaith gyda Theatr Genedlaethol Cymru’n brofiad na wnaf ei anghofio. Mewn cwta wythnos cefais flas ar sut mae gweithio ym myd theatr cyfrwng Cymraeg. Roedd yna awyrgylch braf yno gyda phawb yn gweithio’n galed i lwyfannu cynhyrchiad a fwynheais yn fawr. Roedd ôl wythnosau o waith caled ar y cynhyrchiad ac mae’r cwmni a’r ddrama’n haeddu’r holl glod maent wedi’u derbyn. Roedd y cyfle i arsylwi ar sawl maes o fewn y cwmni’n rhoi blas i mi o gymaint o agweddau sydd angen eu hystyried wrth roi cynhyrchiad at ei gilydd, ac roedd gweld y cydlynu a’r cyd-weithio’n dangos imi mor brofiadol yw’r cwmni. Mae’r wythnos wedi bod yn agoriad llygad gwerthfawr a dwi wedi dysgu llawer am sut mae dod â chynhyrchiad yn fyw ar lwyfan, a hoffwn ddiolch iddynt am y profiad. Roedd bod yn bresennol ynghanol bwrlwm yr wythnos wedi dangos imi y byddai gyrfa ym maes y theatr Gymraeg yn yrfa y buaswn bendant yn mwynhau, ac yn un i’w ystyried ar gyfer y dyfodol.