Ar y cyd â Mentrau Iaith Cymru rydym yn falch o gyhoeddi heddiw ein bod yn gweithio mewn partneriaeth i gyflwyno Clwb Theatr Cymru er mwyn cynnig amrywiaeth o gyfleoedd creadigol a hybu sgiliau perfformio i blant ledled Cymru dros yr haf.
Bydd Clwb Theatr Cymru yn dod â phlant Cymru ynghyd i fwynhau amrywiaeth o weithdai dros Zoom yn ystod gwyliau’r haf. Bydd y sesiynau – sy’n cael eu trefnu gennym ni yn Theatr Genedlaethol Cymru ac yn cynnwys cyfleoedd i ddawnsio, perfformio a chreu cymeriadau – yn addas i blant ysgolion cynradd o flynyddoedd 2 i 6. Bydd yr arbenigwyr sy’n arwain ar yr hwyl yn cynnwys Jalisa Andrews, Ffion Wyn Bowen a Sian Elin. Mae pob Menter Iaith ar draws Cymru yn rhan o’r cynllun, a bydd ymgyrch i ddenu cyfranogwyr o bob ardal dros yr wythnosau nesaf. Mae’r sesiynau’n rhad ac am ddim, ond bydd angen cofrestru trwy’r Fenter leol. Bydd y gweithdai’n cael eu cynnal trwy gyfrwng y Gymraeg; os oes unrhyw anghenion penodol, bydd y ddau gwmni hefyd yn eu diwallu.
Ers nifer o flynyddoedd, rydym wedi gweithio’n agos gyda Mentrau Iaith yng ngorllewin Cymru i ddarparu Clybiau Drama bob wythnos. Yn ystod y clo mawr, rydym wedi bod yn cynnal sesiynau Zoom bob wythnos gyda phlant yn ardaloedd Sir Gaerfyrddin, Ceredigion a Sir Benfro. Dyma’r tro cyntaf i ni weithio mewn partneriaeth â Mentrau Iaith Cymru i ddod â’r holl fentrau ledled Cymru ynghyd a darparu gwaith cyfranogi ar y raddfa hon.
Dywedodd Rhian A. Davies, ein Cynhyrchydd Gweithredol:
“Ry’n ni’n falch iawn o gael cyfle i gydweithio’n genedlaethol gyda Mentrau Iaith Cymru a chefnogi eu hawydd nhw, a’n hawydd ninnau, i roi cyfleoedd i blant ifanc ar draws Cymru ddod at ei gilydd dros wyliau’r haf i gymdeithasu gyda chyfoedion a chael hwyl yn y Gymraeg wrth ddysgu sgiliau celfyddydol newydd gyda thîm o arweinwyr ifanc a thalentog iawn.”
Meddai Lowri Jones, Cadeirydd Mentrau Iaith Cymru:
“Mae’r Mentrau Iaith ar draws Cymru wedi bod yn brysur iawn yn cynnig pob mathau o gyfleoedd i bobl o bob oed allu defnyddio eu Cymraeg yn ystod y cyfnod cythryblus hwn. Rydym wedi llwyddo i wneud hyn drwy gyfrwng technoleg gan ganiatáu i filoedd o bobl ddefnyddio’r iaith mewn amryw o glybiau, dosbarthiadau a gwyliau. Rydym yn falch dros ben o allu cydweithio â Theatr Genedlaethol Cymru sydd hefyd wedi arloesi gyda chynyrchiadau gwych dros y misoedd diwethaf. Rydym yn gyffrous iawn ein bod yn gallu cynnig y cyfle arbennig hwn i blant Cymru ymarfer eu creadigrwydd dros yr haf.”
Mae Clwb Theatr Cymru yn rhan o’n rhaglen Pawb Ar-lein, sef rhaglen o weithgareddau addysg a chyfranogi ar blatfformau digidol er mwyn ysbrydoli plant a phobl ifanc yn ystod y cyfnod o gyfyngiadau symud.
Rydym hefyd yn cynnig dwy elfen arall i’n rhaglen yn ystod y cyfnod hwn:
- Theatr Gen Eto: Dyma gyfle i gynulleidfaoedd fwynhau cynyrchiadau’r gorffennol ar sgrin tra bod ein theatrau ar gau. Gan ryddhau cynnwys o’n archif helaeth, byddwn yn rhannu nifer o’n cynyrchiadau o’r gorffennol ar ein sianel YouTube a hefyd ar blatfform digidol AM (ar-lein ar amam.cymru neu drwy lawrlwytho’r ap ar amam.cymru/ambobdim). Bydd capsiynau caeedig (neu is-deitlau) Saesneg a Chymraeg ar gael yn achos bron y cyfan o’r dangosiadau hyn. Ceir rhagor o fanylion yma.
- Creu Ar-lein: Rhaglen newydd o waith dramatig gwreiddiol gennym yn ystod argyfwng y coronafeirws. Rydym eisoes wedi cyhoeddi prosiectau ar y cyd â National Theatre Wales (Comisiynau Digidol Newydd), BBC Cymru (Dramâu Micro) ac Urdd Gobaith Cymru (Sgidie, Sgidie, Sgidie) fel rhan o’r rhaglen hon, ac mae rhagor o waith ar y gweill. Ceir rhagor o fanylion yma.
Byddwn ni’n cyhoeddi cynlluniau a gweithgareddau pellach fel rhan o Theatr Gen Eto, Creu Ar-lein a Phawb Ar-lein dros yr wythnosau a’r misoedd i ddod.
16 Gorffennaf 2020