Ddydd Gwener diwethaf (10 Mawrth 2017), roedd Castell Caerffili yn llwyfan ysblennydd unwaith eto – y tro hwn i sgwadiau ’sgwennu dawnus o Ysgol Gwynllyw, Ysgol Cwm Rhymni ac Ysgol Gartholwg.

Roedd y tair ysgol yn cystadlu yn rownd derfynol ‘Cipio’r Castell’, sef slam farddoniaeth dan arweiniad Llenyddiaeth Cymru ar y cyd â Theatr Genedlaethol Cymru, Cadw a Chyngor Bwrdeistref Sirol Caerffili, ac wedi ei gyflwyno gan Aneurin Karadog. Roedd y prosiect yn gyfle arbennig i ddatblygu cynulleidfa ar gyfer Macbeth, cynhyrchiad diweddaraf Theatr Genedlaethol Cymru, ac i ddod â’r ddrama’n fyw yn yr ystafell ddosbarth. Yn ystod rownd derfynol Cipio’r Castell, bu’r tair ysgol yn barddoni ac yn brwydro yn erbyn ei gilydd o flaen panel o feirniaid oedd yn cynnwys Fflur Thomas ar ran Theatr Genedlaethol Cymru, clare e. potter (awdur a pherfformwraig) a Rufus Mufasa (addysgwraig Hip-Hop a bardd).

Roedd yn ddiweddglo hynod ddramatig i gyfnod estynedig o weithdai cyffrous; yn y rhain, cafodd 90 o ddisgyblion eu hysbrydoli a’u herio gan ddulliau Shakespeare a chael cyfle i greu barddoniaeth gyda beirdd adnabyddus, sef Anni Llŷn, Aneirin Karadog a Gwynfor Dafydd. Daeth nifer o ddisgyblion o’r tair ysgol i weld perfformiad o Macbeth yng Nghastell Caerffili.

Dewiswyd dau dîm o ddisgyblion o bob ysgol ar gyfer y rownd derfynol, ac mae’n bleser gennym gyhoeddi mai sgwad Ysgol Gyfun Cwm Rhymni oedd yn fuddugol. Fel gwobr, cyflwynwyd copïau o sgript Macbeth i bob ysgol, a chynhelir gweithdai ychwanegol gyda’r disgyblion buddugol. Daeth criw teledu o gwmni Tinopolis i ffilmio’r ornest, a bydd eitem ar y rhaglen Prynhawn Da yn cael ei ddarlledu’n fuan ar S4C (dyddiad i’w gadarnhau).

Blas bach o’r diwrnod yma

Mae’r prosiect  Cipio’r Castell yn rhan o raglen addysgol a chyfranogi amrywiol a lwyddodd i dynnu ynghyd nifer o sefydliadau allweddol i ddod â Macbeth i ystafelloedd dosbarth yng Nghasnewydd, Caerffili a Rhondda Cynon Taf.

Dywed Rhian A. Davies, Cynhyrchydd Gweithredol Theatr Genedlaethol Cymru am Cipio’r Castell:

“Ni fyddai’r prosiect tri mis hwn wedi bod yn bosibl heb gefnogaeth werthfawr partneriaid o feysydd gwahanol – treftadaeth, Llywodraeth Cymru a’r celfyddydau – i wireddu uchelgais i gyflwyno prosiect addysg ac i ymgysylltu â’r gymuned leol yn yr ardal lle llwyfannwyd Macbeth.”